E niha wa ti’ö dama rówaihu’u’wa hã ãma ĩmrõ A’uwẽ Uptabi te nahã?

Resumo

Ãhã rómhuri hã ĩhöimana hã, ĩnhimirówaihu’u na, we ãma ĩtsitsarẽ na duré ãma ĩtsi’manhãrĩ na dama rówaihu’u’wa na ãma ĩmrõ A’uwẽ te nahã. Rówatsu’u ĩmorĩ’rada dahöiba na duré ĩtsihödö te watsu’u ĩwa’õno mono bö uburé aibö marĩ te ãma ’re ĩwaimrami mono dzé hã, tahawa duré ĩpótódzé hã, wahu 1982 na, we ĩprédu hawimhã wate ãma rótsawẽrẽ’u’ötsi rówaihu’uwai’u ĩwitsi dahã, tadza hã, wawi rómhõrédzé Róptede wate’uhã Rómnhõré ’rãihö’uhã (Goiás). Ĩte rówatsu’u ĩprédu hawimhã atéma waihu’u A’uwẽ Marãiwatsété tehã, duré ĩ’uptabi A’uwẽ te nahã, duré idzató ré hã, ĩhawi A’uwẽ date tsani dza’ra wa, ti’a Ẽtẽnhõpré’uhã (São Marcos) tame te ni’wam norĩ ai’ubumrõ pi’õ norĩ duré a’uté norĩ, te rómnhõré dza’ra duré rómhuri’u mate atsitsi duré ĩ’apó höiba’amo te rĩtĩ dza’ra apö tinhipti’a te tsiwi örida. Duré rówatsu’u we ihöimana mono A’uwẽ ĩ’ahö nhõ’a ĩhö’a norĩ mate tsiwi pótó damrẽme nhidö hã, A’uwẽ te rówaihu’udzé A’uwẽ Uptabi höimana dzé duré dapó’redzapu duré niwamhã rówaihu’udzéb’uhã. Rówatsu’u höimanaré, ma duré wama tsõ’a dza’ra danhõ’uma ’remhã, ĩhö’a nhitsiwi dahöimana dahã pótó A’uwẽ mrẽme nhihötö dahã. Ma duré wama tsõ’a dza’ra A’uwẽ tsi’manhãrĩdzé hã (datsi’wa’uburé, ritual) danhõ’uma te’remhã, dapó’re dzapu’una niha rómnhõré’wa tsi’manhãrĩdzém na danhõ’uma te rómnhõré dzéb’re.